İqtisadi İslahatların Təhlili və Kommunikasiya Mərkəzinin (İİTKM) nəzdində fəaliyyət göstərən Türk Dünyası Araşdırmalar Mərkəzinin (TDAM) rəhbəri Vüsalə Cəfərova “Azərbaycan Halal Biznes və Turizm Forumu”nda iştirak edib. “Regionda halal turizmin inkişafı” adlı panel sessiyaya moderatorluq edən V.Cəfərova qlobal miqyasda halal turizmin inkişaf dinamikası və gələcək perspektivləri barədə məlumat verib. O, turizmin inkişafının dövlətin prioritet istiqamətlərindən biri olduğunu bildirib, Qarabağ və Şərqi Zəngəzur iqtisadi rayonlarının turizm potensialı və həyata keçirilən layihələri xüsusi qeyd edib. Panel sessiyada İslam Ölkələrinin Standartlar və Metrologiya İnstitutundan(SMIIC), həmçinin Azərbaycan, Böyük Britaniya, Pakistan, Bosniya və Herseqovinadan olan nümayəndələr halal turizm mövzusunda təqdimatlarla çıxış ediblər.
Azərbaycan Respublikasının İqtisadiyyat Nazirliyi, Dövlət Turizm Agentliyi və Kiçik və Orta Biznesin İnkişafı Agentliyinin (KOBİA) təşkilatçılığı ilə keçirilən forumda 20-yə yaxın ölkədən rəsmi şəxslər, mütəxəssislər, sahibkarlar, akademik dairələrin və beynəlxalq təşkilatların nümayəndələri iştirak edirlər. İki gün davam edəcək tədbirdə halal sənayenin inkişaf perspektivləri, bu sahədə standartlar, sektora investisiya qoyuluşu və əməkdaşlıq imkanları müzakirə ediləcək. Forumun məqsədi investisiya və ticarət sahəsində yeni əməkdaşlıqların qurulmasına, müvafiq sahədə fikir və təcrübə mübadiləsinə töhfə vermək, Azərbaycana xarici sərmayələrin cəlb edilməsini təşviq etməkdir.
