Gərgin mübahisə şəraitində keçirilən Tramp-Zelenski görüşü bitib, lakin onun beynəlxalq ictimai fikrə təsiri davam edir. Hərçənd ki, bu görüşdən əvvəl Amerika tərəfində Zelenskinin təbii resursların istismarına dair razılaşmanı imzalayacağına bir inam vardı və hətta Tramp adminstrasiyası bu barədə məmnun görünürdü. Lakin Zelenskinin Ağ Evdə aparılan müzakirələrdə Zelenskinin sözləri Trampın xoşuna gəlmədi və o, sözün əsl mənasında dövlət katibi ilə birləşib Ukrayna Prezidentinin payını verdi.
Görüşdə Trampla Zelenski arasında ciddi fikir ayrılıqları ortaya çıxdı. Tramp Ukraynanın Rusiyaya qarşı mövqeyini tənqid edərək, Zelenskini “Üçüncü Dünya Müharibəsi ilə oynamaq”da ittiham etdi. O, ABŞ-ın Ukraynaya verdiyi dəstəyin kifayət qədər qiymətləndirilmədiyini və Ukraynanın daha çox minnətdarlıq göstərməli olduğunu vurğuladı. Tramp həmçinin, Ukraynanın Rusiya ilə atəşkəsə razılaşmasını və Amerikanın təhlükəsizlik təminatları olmadan sülhə doğru addım atmasını tələb etdi.
Zelenski isə Rusiyanın əvvəlki razılaşmaları pozduğunu və Putinə etibar etmədiyini bildirərək, ABŞ-ın dəstəyinin davam etməsinin vacibliyini qeyd etdi. Görüş, tərəflərin razılığa gələ bilməməsi səbəbindən vaxtından əvvəl başa çatdı və Zelenski Ağ Evi planlaşdırıldığından əvvəl tərk etdi.
Artıq dəqiqdir ki, Amerika Ukraynanın arxasında durmayacaq, onun Rusiya ilə apardığı müharibəyə bir dollar da xərcləməyəcək və hətta Bayden adminstrasiyası dövründə Kiyevə verilən 350 milyard dollar da gec, ya tez geri alınacaq. Tramp açıq şəkildə bəyan edir ki, o, Ukraynaya edilən yardımların ABŞ üçün faydasız olduğunu bilir və Amerikanın artıq bu uğursuz layihədən ziyan görməsini istəmir. O, ABŞ-ın maraqlarını ön planda tutaraq Ukraynaya verilən dəstəyin yenidən nəzərdən keçirilməsinin vacibliyini vurğulayır.
Tramp-Zelenski görüşündən dərhal sonra Avropa liderləri bir-birinin ardınca bəyanat verir. Boş, heç bir siyasi yükü və məzmunu olmayan Ukraynaya dəstək bəyanatları təəssüf ki, bu gün də davam edən müharibəni dayandırmaqda və Ukraynanın mütləq qələbəsini əldə etməkdə təsirsizdir. Çünki Ukraynaya dəstək edən sözlər, fikirlər artıq bəyanat səviyyəsində qalmağa başlayıb. Avropalılar da, amerikalılar da yorulub, onlar ödədikləri verginin Ukraynada davam edən mənasız müharibəyə sərf olunmasını istəmir. Artıq elə br vəziyyət yaranıb ki, bir vaxtlar Ukraynaya siyasi-hərbi dəstək verən ABŞ bu gün onun parçalanmasına göz yumur, onun təbii sərvətlərinin mənimsəməyə çalışır. Lakin Amerikanın əsas müttəfiqi olan Avropa ölkələrinin heç biri Trampın addımlarının açıq şəkildə tənqid edə bilmir, onların bəyanatları Zelenski haqqında xoş sözlərdən ibarətdir. Deməli, bu bəyanatlar real addımlarla dəstəklənmədiyi üçün Avropanın Ukraynaya qarşı ikiüzlü siyasət həyata keçirdiyi iddialarını gücləndirir. Avropa Ukraynanı Rusiyaya qarşı mübarizədə təşviq etsə də, praktiki dəstək verməkdə tərəddüd edir. Bu vəziyyət də Ukraynanın Rusiyanın qarşısına təkbaşına çıxmasına səbəb olub və Avropanın məsuliyyətdən qaçdığı təəssüratını yaradıb.
Zelenski indi təkbaşına qalıb, vəziyyətdən çıxış yolu axtarır. Bir vaxtlar ucadan danışıb onun bəyanatlarını ayaq üstdə alqışlayanlar da yavaş-yavaş bağlı qapılar arxasında gizlənməyə başlayıb. Avropa da qaçmağa, Ukrayna bataqlığından çıxmağa fürsət gözləyir. Deyəsən, onlar da anlamağa başlayıb ki, vəziyyət bu cür davam edə bilməz. Bəlkə Tramp haqlıdır.
